قصة مصر كاملة: من مصر الثورجية لمصر الإخوانجية لمصر الثورجية يا حبايبي رجعنا من تاني، و تاني تاني ...رجعنا يا حب من تاني..
بقلم: جميل محمد الشوا
و في الصباحية؛ صباحية ٥٢، والشلة اللي هيا...ظباط صغار في غفلة من الزمان، قاموا و قالوا للي قاعد في المنتزه و عابدين و راس التين، قوم و روح ، دي مصر دلوقت بقت حرة و انت يا وعدي غريب عليا و مصر مش تكية..
قام شال تاجة وأعطاه لناصر و الشلة هدية...
و تعظيم سلام لملك ورق الكوتشينة..
وابتدأ المشوار بكلمه في الراديو للسادات..
والشعب هلل و قال فرجت ، اهو حاكمنا نجيب و الشلة...
و في ليله ضلمة القمر فيها استخبى, نجيب بعد ما شرب الكاس ،اتشال خلسه..
و ناصر و عامر كلوا الكحكة، و عامر بالحشيش بعدها حبس الحتة..
و قام ناصر يبرطع بالحته و قال للفلاح بالغيط، قوم ياصحبي دا نت بقيت صاحب الحتة...
وروح جروبي ، دة في مارون جلاسيه و حاجات حلوة، و راديو و مترو دول يا مصري بقوا ملك الحتة..
والمصري بطيبته صدق الكدبه..وفي السكة يا عيني اتبهدل واطرد واتضرب و اتزل و برضة قال لناصر والشلة ، فين الحته، دانتوا برضة اهل بلد..و إحنا اتوعدنا بالكحكة...
رد ناصر و قال ، يا غُشم ياعُمي انتوا صدقتوا الكدبه، دي كانت من ابو ذيد الهلالي حته و خلصت التوتة...روح بيتك و سك عل اهلك و بابك لبعتلك نصر و بسيوني والشلة يخلوك تشوف في عز الضهر نجمة و كحكه...
و في يناير في عيد الشرطة.. وقف الشعب و قال أنا عايز الكحكة اللي اتوعدت من ٥٢ و ليها و بيها اتعشمت و حطيط في عيني كحله ...
و مشي في الميدان و زعق و قال كفاية...دانتوا لا اهل بلد ولا حكاية...
دانتوا فراعنة و حدوتة راحت،
بره بقى، روحوا طرة و سكوا عل الباب من غير رجعة..
و المشير و الفريق والجيش قالوا ماشي، خدوا الكحكة بس إحنا قاعدين نحرس الحته...
والشعب كحل صباعة و خد الكحكة ...و عل الجبين رسم زبيبة...
و قال يا مرسي الزناتي يا بوالعباس يا فتوة أنا عملتلك من جبيني و عل جبيني زبيبة، خدها واذا عايز كلها بس اوعى تنسى الحكاية، حكاية الكحكة و صبرنا من ٥٢ و الاف السنين عل الحته...
والاخوانجي مرسي قعد عل كرسي فاروق و شلة اتنين و خمسين في التمام والكمال سنة و بعدها الشعب هاچ و ماچ و قال لا دي كانت نكاية و لعبة و حكاية،
وجه في "التي ڤي" تاني صوت الجيش بتاع اتنين و خمسين والشلة بس المرة دي الصوت مع صورة وكان السيسي و قال الشعب يا مرسي قال كفاية، قوم ياخويا الدور عليك و السنة في عابدين عليك كفاية،
مرسي قال والانتخابات يا سيسي تلات سنين لسة و فكة و شوية،
السيسي قال الشعب يا مرسي في السكة و اللي اتعمل في حسني اللي منا و فينا لازماً يا مرسي يتعمل فيك و لازماً الان قبل بكرة تلم انت وأُم أيمن والعيال يا حبيبي و تروح،
مرسي قال و عابدين والاتحادية والبط و الوز و والكستليتة اللوز والزغطة والكنافة والحاجات الحلوة،
السيسي قال كلة يستمر بس يا ريس مرسي انت والشلة في طرة،
والمصري رجع، لِورا و لقدام رجع، و قال يا جيش خد تاني كحكة من أيدي و في عيونك كحلة،
مرسي الاخوانجي دة كان محلل علشان يا جيش توعى وتتعلم،
والجيش قال عيب يا شعب دة انا في الخدمة، بس انتي يا مصرية يم عيون بكحلة شقية بصباعك يا طعمة اشري و قولي تعال يلا،
والمصرية ردت وقالت ماشي يا جيش و يا سيسي حعمل نفسي ناسية حكاية ناصر والبهدلة والشلة وحصدق تاني الكلمة الحلوة بس يا سيسي خد بالك، المرة دي انا فهمت اللعبة، وبخاطري حصدق الكلمة الحلوة ولو كدبة، و بخاطري يا سيسي حقبل العب اللعبة.
جميل
