والفلسطيني قال سلام، و رد الاسرائيلي و قال شالوم...
وبين السلام والشالوم، السياسه عملت بحور و وأنفاق و صواريخ و محيطات...
و بين ولاد ابراهيم و ابراهام دخلوا أغراب و غربان، دخلوا من الجانبين و من الجيران ومن الأطراف...
في دوله اسمها اسرائيل و على الطريق راح يكون في غزة والضفة دوله وراح يكون اسمها فلسطين..
بس الطريق طويل بطول الولاد اللي ضيعوا الطريق...
في الضفه و غزه و في بلاد عرب و بلاد قبل ٤٨، ولاد و رجال وأشباه رجال و تجار و أشباه تجار من زمن ٤٨ ولهادا الوقت في شعب مستعر يقول اااااااه ،مسكوا الطريق و تاجروا في الطريق وهالقيت متل النسوان في أطراف الحواري بدموع تماسيح بيقولوا وينك يا طريق...
والطريق مل و زهق من ناس من غير قافيه و قوافي بالصرم بيدعسوا عليه....
شعوب على القوافي وفي القوافي ملوك...
شعوب رضعت أنو السياسه لأهلها و لغيرهم حرام...
شعوب اتربت وكبرت على أهل سياسه في السياسه بيغنوا و بيفتوا و بس ما بيعرفوش الا انها ' صبوا هالجهوة و زيدوها هيل و اسجوها للنشامى عل ظهور الخيل...'
شعوب اتربت و كبرت تلطم و تعيط و تبكي...
شعوب في هادا العالم ماالهاش في العالم متل في الصراخ والسب، و ماالهاش في العالم متل في لوم العالم كله و هيا الشر بره و بعيد....
شعوب اتربت أنو اذا ماكنلكاش كبير، روح و اشتري كبير....
شعوب بتاكل و بتنكر و بتف و بتشرب من نفس البير...
شعوب و شعوب وفي الاخر بيسبوا الطريق اللي رح يوصلهم للطريق..
جميل
01/29/2014
No comments :
Post a Comment